خطة عمرو دياب لإزاحة ألبوم تامر حسنى الجديد من على القمة

فريق راجل. دوت كوم


من كام يوم كل الناس اتفاجئت بنزول ألبوم تامر حسنى الجديد " عمرى إبتدا " واللى تم التأكيد من إدارة أعمال تامر على إن الألبوم اتسرب ومنزلش رسمي وده فى بيان على صفحتة الرسمية ، وعلشان ميبقاش خسر كل حاجة قرر تامر حسنى ينزل الألبوم كله بعدها بساعتين على قناته الخاصة على الـ YouTube ..


كل ده والناس مختلفة هلى التسريب تم عن طريق شركة "روتانا " المنتجة للألبوم ولا حركة عملها تامر حسنى وفريق عمله للفت الإنتباه وإكتساب تعاطف الجمهور وبالتالي الألبوم ينجح ... حالة الجدل دى كانت واخده الألبوم فى سكة الإنتشار بشكل كبير خصوصاً ان الاغاني فيها ستايلات مختلفة ومزيكا جديدة نوعاً ما .. وكمان علشان ساحة الغناء حالياً فاضية ... مفيش اي البومات نازلة حالياً غير البوم تامر ... لحد ما تدخل الهضبة ..

بوست على صفحة شركة " ناى " اللى انتجت آخر البومات عمرو دياب " أحلى وأحلى " بيقول إن الهضبة بيستعد لنزول نسخة جديدة من الألبوم هيكون فيها نفس الأغانى وبعض الاغاني هيتعملها " ريمكس " وهتنزل قريب ..


ربط الجمهور بشكل كبير بين الخطوة دى اللى اول مرة عمرو يعملها بشكل رسمي وبالسرعة دى بعد نزول الألبوم بتاعه بكام شهر بس .. وبين نزول البوم تامر حسنى فى نفس التوقيت .. واللى شافها الناس خطوة فرد عضلات من عمرو دياب علشان يثبت للناس كلها انه رقم 1 وانه موجود على الساحة وواخد كل الانتباه حتى لو بالبوم كل اغانيه قديمة ..

tamerhadaba.png

الحرب رجعت اشتدت تانى بين التراس الهضبة والتراس تامر حسنى على السوشال ميديا .. واللى كانت بدات تهدا شوية لكن الموقف ده رجع حرب الببوستات والكومنتات بين الفريقين تانى .. عموماً الايام الجاية هتثبت هلى فعلاً عمرو دياب هيتبع الخطة دى دايماً وينزل نسختين من الالبوم ولا بس كانت مجرد " تزنيق " على البوم نجم الجيل ؟!


شارك هذا المقال: