بالأرقام ..حماقي أفضل من عمرو دياب ؟

فريق راجل. دوت كوم


الصراع بين الجيل الجديد والهضبة عمرو دياب على زعامة الأغنية المصرية لاينتهي .. وعمرو بقا بيواجه تحديات ومقارنات مع اكتر من نجم شاب أبرزهم تامر حسنى ومحمد حماقي اللى قلب الدنيا من كام يوم بسبب كليب ( مابلاش ) اللى حقق نجاح رهيب .

72016151910882-2-.jpg

ألبوم حماقي ( عمره مايغيب ) حقق نجاح وشهرة كبيرة جداً لما نزل رغم انه كان بيضم عدد كبير من الأغاني إلا إن معظمها نجح بشكل كبير عند الجمهور .. وفى المقابل ألبوم أحلى وأحلى للهضبة برضو لاقي نجاح كبير بين الجمهور وكان أفضل كتير رد الفعل عليه من الألبومات اللى سبقته ..

إنما فى منطقة الكليبات عمرو دياب مازال بيعاني معاناة شديدة من وقت كليب تملى معاك .. كل الكليبات بتاعته تقريباً واحدة وتعتمد على الحركة والموديلز والرقص ... فى حين ان كل النجوم الشباب بدأول يركزوا فى الكليبات اللى ممكن تعيد الحياة لألبوم من جديد ...

وده اللى عمله كليب حماقي الجديد ( مابلاش ) .. أولاً اختار أغنية دراما وعملها فكرة متعوب عليها ، كل الناس اتخدعت فيها أول ماتفرجت عليها وناس كتير من كتر التأثر بيها دمعت وافتكروا الناس اللى فارقوا الحياة ..

والدليل الأرقام ... كليب جمالو لعمرو دياب أول مانزل حقق 650 ألف مشاهدة على يوتيوب فى 48 ساعة ... في حين إن كليب مابلاش لحماقي حقق فى نفس الـ 48 ساعة مليون و 850 ألف مشاهدة تقريباً ! وده فرق كبير جداً بيهدد عرش عمرو دياب اللى متعود يكون دايماً رقم 1 فى كل حاجة .. صحيح كليب جمالو داخل على 10 مليون دلوقتى ولكن لو ماشيين بنفس المعدل متوقع كليب حماقي يعدى الرقم ده بسهولة .

الديابية المتعصبين بيقولوا ان الكليبات عمرها ماكانت دليل وإن عمرو طول عمره مش مركز فى الكليبات لأنه مش ممثل ولكن مركز فى الغنا ... فى حين ان انصار النجوم التانيين بيقولو اننا فى عصر الديجيتال والسوبر ستار الحقيقي لازم يبقا مبهر فى كل عنصر من عناصر الشغلانة ..
إنت رأيك إيه ؟


شارك هذا المقال: