هل شهادة أمان تنفع تستثمر فيها فلوسك ؟

أحمد صلاح

كلنا بنشوف اعلانات شهاده أمان واحنا قاعدين قدام التلفزيون بس طبعا فى الاعلان مش بنعرف ايه هيا شروطها والشهاده دى لطبقه معينه ولا لكل الناس .. انهارده بقه هنوضح كل حاجه عنها ونشوف هل هيا مجديه كاستثمار ولا لا ؟؟
الشهاده دى بتقدر تشتريها من اى بنك بالبطاقه الشخصيه .. وهيا مختلفه عن شهاده الاستثمار اللى هيا بعائد 16% لان شهاده امان عباره عن حاجتين فى حاجه واحده اللى هما الاستثمار والتأمين


مين يقدر يشترى الشهاده ؟
اى مواطن من سن 18 لغايه 59 سنه .. سواء كان مؤمن عليه او مش مؤمن عليه .. بس الدوله عاملاها فى الاساس عشان الناس اللى مش مؤمن عليهم وبره نظام التأمينات زى عمال اليوميه مثلا


شهاده أمان دى بكام  ؟
500 جنيه للشهاده وكل واحد يقدر يشترى لغايه 5 شهادات يعنى 2500 جنيه والشهاده مدتها 3 سنين وبتتجدد كل 3 سنين وطبعا من غير ماتدفع حاجه زياده .. والشهاده الفايده بتاعتها 16% وكل شهر انت المفروض هتدفع 4 جنيه مقابل قسط التأمين .. وعشان يوفروا الوقت عليك بدل ماتروح كل شهر تدفع قسط التأمين دا .. هما هيخصموه تلقائى من الفايده بتاعت الشهاده
يعنى مثلا لو قررت تشترى شهاده واحده ب 500 جنيه .. بعد 3 سنين الفايده هتكون 240 جنيه هيتخصم منها 144 جنيه اقساط التأمين وهيتبقى 96 جنيه دول ربحك من الشهاده


طيب ميزه الشهاده دى ايه ؟؟
الميزه الاساسيه فى الشهاده هيا التأمين واللى هيستفاد بيه الورثه فى حاله الوفاه سواء كانت طبيعيه او عن حادث
وهنا انت بتختار اذا كان تعويض الورثه ياخدوه عباره عن 10000 جنيه للشهاده لو وفاه طبيعيه او 50000 جنيه لو الوفاه عن حادث


طيب لو عايز الورثه يستفيدو بمعاش ؟؟
هنا هتختار ياخدو المعاش بملغ 200 لمده 5 سنين او 120 جنيه لمده 10  سنين ده لو وفاه طبيعيه انما لو وفاه عن حادث يبقى هياخدو 1000 جنيه لمده 5 سنين او 600 لو على 10 سنين وطبعا الارقام دى لو اشتريت شهاده واحده انما لو قررت تشترى 5 شهادات يبقى تضرب الارقام

دى فى5

طيب لو معايا فلوس زياده هل الاستثمار فى شهاده امان مجدى ؟
اكيد لا .. لان انت ممكن تشترى شهاده من البنك وتاخد فايده 17% كامله بدون اى اقساط تأمين ..
يبقى الشهاده دى هتكون مجديه جدا للناس اللى مالهومشى اى تأمينات وعايزين يفيدوا اهلم بعد لا قدر الله الوفاه ..



شارك هذا المقال: