أكتر 5 شخصيات مستفيدة من نزول ألبوم عمرو دياب

فريق راجل. دوت كوم

طبعاً نزول ألبوم الهضبة بيكون حدث كبير فى الشارع الموسيقي فى مصر والعالم العربي .. علشان ده ألبوم عمرو دياب مش أى حد .. وكالعادة فى كل ألبوم عمرو لازم يشوق جمهوره عن طريق السامبلز وعمل كدة مع ألبوم " أحلى وأحلى " اللى لقا نجاح كبير جداً من جمهور عمرو مع إنه مفاتش ساعات على طرحه ، وأكيد كل الناس اللى بتحب عمرو دياب مبسوطين بنزول الألبوم ولكن الكام شخص الجايين دول هم الأكثر سعادة :

1- محمد نصر
مخرج البرامج الرياضية الشهير محمد نصر الدين مدمن كليبات لقطات اللاعيبة مع أغانى عمرو دياب ... دايماً مع كل البوم للهضبة يبقا عنده أغنية مفضلة يحطها على لقطات مجمعة للاعب معين من الأهلى او الزمالك لما يحب يحتفل بيه أو " يصيته " او لما يكون ضيف فى الاستوديو .. من الاغانى اللى نحتها محمد نصر كتير " الله على حبك إنت " .. و " أنا مهما كبرت صغير " ..و " إنت الغالي " .. وغيرهم ..ياترى أغنية إيه اللى هيمسكهالنا دائم الإبداع فى الألبوم الجديد ؟

2- رامي صبري

الفنان رامي صبري بيعتبره البعض الإصدار الصغير من عمرو دياب .. وهو نفسه إعترف أكتر من مرة إنه مثله الأعلى .. ألبوم عمرو دياب بيبقا زى الكتالوج أو المنهج اللى بيمشي عليه رامي صبري بعد كدة.. سواء فى نوع المزيكا وموضوعات الأغانى ... حتى تصوير الكليبات والحركات والموديلز وقصات الشعر ! مش هتحس إنك بتتفرج على حد تانى غير عمرو دياب بس على أصغر شوية .

ramyamr11.jpg


3- عمرو مصطفي

رغم العلاقة المتوترة بين الملحن الكبير والهضبة إلا إن ألبوم " أحلى وأحلى " هيكون مفرح لعمرو مصطفي بشكل كبير ، مش لأسباب إنسانية ولا فنية بس ولكن لأسباب شخصية بحتة .. الألبوم ده هو الأول من إنتاج عمرو دياب عن طريق شركة ناى .. وده بعد إنفصال الهضبة عن شركة روتانا والمشاكل الكتير بينهم .. وكان عمرو مصطفى قال أكتر من مرة إنه حذر عمرو دياب من المصير ده ونصحه ينتج لنفسه من 10 سنين قبل كدة لكن عمرو مسمعش كلامه .. ونزول " أحلى وأحلى " من إنتاج عمرو دياب بيعنى إنتصار لكلام ووجهة نظر عمرو مصطفي .

4- السياسي

كتير من الشخصيات السياسية فى مصر مستفيدة إستفادة غير مباشرة من نزول ألبوم عمرو دياب فى التوقيت ده ، خصوصاً على مواقع السوشال ميديا اللى كان كل روادها شاغلهم موضوعات سياسية مختلفة بين المؤيد والمعارض واللى بيشرح وجهة نظره واللى بيحاول يغلط التانى ... بس كل ده إنتهي خلاص .. لا صوت يعلو فوق صوت ألبوم عمرو دياب !


5- الــ DJ Man

إنت متخيل أى DJ دلوقتى فرحته عاملة إزاى ؟
كنز وإتفتحله .. أغانى حب وهيصة ورومانسية ومش لأى حد .. ده الهضبة
حتى لو مستوى الأغنية مش قد كدة فمجرد إنه بيشغل حاجة لعمرو دياب وجديدة كمان فبتضمنله " يولع الجو " من غير أى مجهود ، هو بس يشغل وخلاص وكله عارف الباقي .. خصوصا كمان أجواء الصيف والمصايف بدأت من بدرى وصوت عمرو على البحر شئ مختلف

images.jpg


شارك هذا المقال: