المفاتيح السبعة للتعامل مع أى ست !

شيماء عادل
شارك هذا المقال:

زى ما الرجالة عندهم صفات معينة فى شخصياتهم وليهم أسلوب معين فى التفكير والتصرفات حتى بالرغم من إختلافهم، وشايفين إن مفيش أى ست ممكن تفهمهم وتقدر التصرفات دى "ودى حقيقة" فبرده الستات عندهم مفاتيح كده معينة وأسرار وأسلوب معين فى شخصياتهم وهما كمان بيشوفوا إن مفيش أى راجل فاهم أو حاسس أو بيقدر دا "ودى كمان حقيقة".

ويمكن أصلا هو دا إللى بيسبب المشاكل والخناقات عند معظم الناس..."فهم" طبيعة الشخص إللى بتتعامل معاه.

علشان كده قررنا نقولكوا على مفاتيح شخصية أى بنت،، الحاجات الموجودة عند أغلب البنات إن مكنش كلهم وعليك أنت تفهم الطبيعة دى وتعرف أنسب طريقة ليك علشان تتعامل معها.

vlcsnap-174.jpg

1- المناقشة

قولنا نخليها رقم 1 لأهميتها، لأن النقطة دى بالذات هى أكتر حاجة ممكن تسبب مشاكل.

الراجل بطبيعته إللى أنتوا عارفينها إنه بيحب يكون هو المسيطر ودا حقه لكن الحوار كله فيين بقى؟! فى إنه بيحاول يفرض السيطرة دى بشكل ديكاتورى ومركزى..خبط لزق كده.

وهو دا الغلط، إنه بيكون عايز يقول رأيه وينفذه بدون أى نقاش منها ومن غير ما نقعد نلت ونعجن كتير.

Ragel-We6-Setat_34.jpg

كل إللى البنت بتكون عايزاه إنه يتناقش معاها وياخد رأيها ويحسسها إنه مهم كمان ومع شوية مناقشة وطرق سحرية ولولبية فى الكلام هيعرف يقنعها برأيه وينتهى الحوار نهاية سعيدة "شوفت سهلة إزاى".

كمان حاجة لازم تعملها علشان تكسب النقطة دى لصالحك، وهو إنك تنقى مواضيع مش كبيرة أوى بالنسبالك أو مش فارقة معاك وتاخد رأيها وتنفذه، حاجات زى تجيب إيه هدية لصاحبك مثلا أو تختارلك لون للساعة الجديدة أو أنهى لون للعربية الجديدة أو نصيف فين السنة دى وهكذا ودا علشان أنت هنا بتحسسها بإنك فعلا مهتم بآرائها ومعجب بشخصيتها وتفكيرها وكل البلا بلا دا "من وجهة نظرك طبعا" فا مش هتخسر حاجة بالعكس صدقنى هتكسب...

الحوار كله بالنسبالها إنها تطمن فى الأول إنك مديها وضعها وتحس إنها شريكة حياتك فعلا مش مجرد كومبارس صامت.

2- الرومانسية وكده

دى حاجة كلنا عارفينها ويمكن أنت كراجل بتقابل بنات كتير الموضوع دا بيبقى عنده بزيادة وأفورة تفقع المرارة. 

بس خلينا نتفق إنك أنت نفسك كراجل أكيد مش هتكون فتاة أحلامك سيد سنجة مثلا ولا عايز واحدة باردة معندهاش أى مشاعر، بس الإعتدال حلو.

tvsupplement1-443877.jpg

البنت..أى بنت بطبيعتها رومانسية "على إختلاف أشكال الرومانسية على فكرة" يعنى فى واحدة رومانسية بالكلام وواحدة تانية رومانسية بالأفعال وواحدة بتحب تكون رومانسية لجوه كده من غير ما تظهر دا، فأنت بقى كل إللى عليك إنك تشوف أنت بتتعامل مع أهى نوع بس فى العموم كتر من الأحضان لأن فى دراسات كتير أثبتت اهمية الحضن بالنسبة للبنت لأنه بيعكس حنان الراجل وإهتمامه بيها، وكمان دراسة أثبتت إن الستات بتثق فى أى شخص يحضنهم أكتر من 15 ثانية! فطول من الأحضان وقلل من الكلام.

3- أصلى مخنوقة شوية

الجملة دى شهيرة جدا عند البنات وأكيد فى مشوارك عديت عليها بدل المرة ألف، والنقطة دى يمكن مرتبطة شوية بالنقطة إللى قبلها، وهى إن البنت حساسة ورومانسية وعندها مشاعر فياظة "آآه والله" فعلشان كده تلاقيها بتزعل من أقل حاجة وبتكون حساسة جدا لأى كلمة تطلع منك حتى لو من غير قصد وتلاقيها دموعها قريبة وساعات نفسها تهفها على كآبة وتقعد تقلب فى أى حاجة قديمة علشان تكتآب بزيادة.

20160214193153.jpg

دى حتى الدراسات أثبتت إن المرأة بتبكى من 36 إلى 64 مرة فى السنة على عكس الراجل إللى بيكون من 6 إلى 17 مرة بس.

4- خليك رجل الخطوة الأولى

مش أنت بتحب تسيطر؟!! يبقى كمل جميلك بقى وخليك أنت إللى بتاخد أول خطوة فى كل حاجة.

أى بنت بتحب الراجل إللى بيعرف يـ lead ويكون شجاع وعنده جرأة ويعرف يحسم أموره لا بيخاف ولا يتردد ولا يكون تايه ومش عارف هو عايز إيه.

Ragel-We6-Setat_13.jpg

وبالرغم من إنك ممكن تكون بتلاقى عكس دا فى الواقع وتلاقى بنات هى إللى بتاخد الخطوة الأولى فى حاجات، لكن خدها كلمة إنها من جواها هتكون عايزاك تلعب أنت الدور دا حتى لو مش طول الوقت بس مهم جدا بالنسبالها أنها تحس إنك "رجل المبادرة"


5- لازم أصحابك يحبوها

دى كمان من الحاجات إللى البنت مش بتقولها أبدا لحبيبها، بس هى حاجة مهمة جدا عندها لأنها عارفة أهمية أصحابك عندك وقد إيه أنت بتهتم برأيهم وبتقعدوا تلكوا مع بعض فى الحاجات دى، فعلشان كده هى بتحب إنها تكون فى نظرهم كويسة ولذيذة ومحترمة وتعكس إنطباع كويس عندهم بإنها تتعامل معاك كويس جدا قدامهم وتحاول دايما تديك وضعك وبالتالى

هيبقوا هما سلاحها الخفى فى غيبتها وهيقولوا كلام كويس عنها فى ضهرها ولو حصل مشكلة بينكوا ممكن يدافعوا عنها كمان. أما لو العكس إللى حصل فممكن دا يتسبب فى فشل علاقكتم أصلا، لو شافوا إنها مغرورة أو متنكة أو مش مهتمة بيك يبقى أكيد هيحاولوا يخلوك تخلع.

9710539671471092008.jpg


6- المرأة والصدق

ينفع اسم فيلم..بس فيلم واقعى ووثائقى كمان لأنه حقيقة لا تحتاج أى إثباتات.

صحيح إنه مفيش حد مبيكذبش لكن إنك تكدب عليها خاصة لو حوار كبير بتكون غلطة بفورة، مش علشان كدبت لكن علشان هى دماغها بتروح لأبعد من كده..

بتروح لأنك عامل عملة سودا ورا الكدبة دى وإنك مش بتحبها طول السنين إللى فاتت وإنك كنت بتلعب بيها وتتسلى مش أكتر ويمكن كمان كنت مراهن صحابك عليها ولا حاجة!

20160124230013.jpg

وسبحان الله ربنا خلق الستات كده زى مايكون عندهم أجهزة إستشعار خاصة بالكدب، فممكن تلقط الكدبة من على بعد 3 أيام قبل ما تكدبها..

من أول ما تفكر تكدبها أصلا، فهنا متحاولش إنها لو جات سألتك إنك تكدب تانى على الكدبة الأولى لأن دا هيسود الموضوع زيادة.

والحقيقة بتقول إن المرأة ممكن تكدب 3 مرات فى اليوم إنما الرجل بيكدب ضعف الرقم دا...

7- الرغى

الدراسات بتقول إن معدل كلامها فى اليوم 20000 كلمة فى اليوم وإحنا مش هنكدب الكلام دا أكيد بالعكس هنتفق معاه، لأن أكتر واحدة ممكن تكون مش بتحب الرغى هتبقى من وجهة نظر أى راجل رغاية برده ، لأن معدل كلام الرجالة فى اليوم مش بيعدى ال 7000 كلمة !!

cro.jpg

شوفت الفرق.. علشان كده حاول تعمل توازن بينك وبينها ومش على طول تصدها أو تبقى بتقفل معها فى الكلام علشان تنهى المكالمة وتقوم تمارس حياتك كإنسان عادى، حاول ساعات تسيبها ترغى وطلع كل إللى جواها وتتكلم فى كل المواضيع إللى فى الدنيا معلش تعالى على نفسك مكالمة واحدة من مكالمات اليوم وخليها تعدى بالشكل دا.