إزاى تكشف على عفشة عربيتك بنفسك ؟

أحمد صلاح

دايما بننصح بعد كل 20 الف كيلو تعملهم بالعربيه انك تروح لأى عفشجى عشان يربطلك عليها والموضوع دا مش بيكون مكلف يعنى تقريبا من 50-100 جنيه .. المشكله ان اللى بيربط على العفشه مش شرط يقولك كل المشاكل اللى فيها او ممكن يقولك على حاجه فيها ويكون بيشتغلك .. طيب ازاى تكشف على العفشه بنفسك .. بص ياسيدى

اختبار المساعدين

3620_1.jpg

هتروح عند كل جنب من العربيه ( يمين قدام ويمين ورا وشمال قدام وشمال ورا ) وبكل عزمك تضغط على العربيه جامده وتسيب وتتفرج على رد فعل العربيه .. لو تمام هتلاقى العربيه ردت تانى بسرعه وثبتت فوق طيب لو لقتها ردت وقامن نازله تحت تانى يبقى العفشه فى النقطه دى مش تمام وفى الاغلب هيكون يا اما ( ضعف ياى ) يا أما المساعد حالته مش كويسه

طيب وانت ماشى بالعربيه .. لما بتيجى تاخد بلاعه او مطب وانت جوه العربيه بتحس بأيه ؟ بأن العربيه بتاخد الحفره دى وتسمع صوت تخبيط كدا ولا بتحس بتناغم فى رده العربيه , لو حسيت ان الوضع مختلف وان فيه هبد فى العفشه كدا لازم تكشف عنها يامعلم

اختبار الاسكترا

brake-service-Tyler-TX-1-.jpg

بص اقف بالعربيه ودور الموتور وهات الدريكسيون من اقصى اليمين لاقصى الشمال والعكس المفروض ماتسمعش غير صوت حركه الكاوتش واحتكاكه بالارض
انما لو سمعت اى طقطقه او تكتكه يبقى كدا العيب ممكن يكون فى حاجتين اما الاسكترا اللى ماسكه الدريكسون او طلمبه الباور

اختبار الفرامل

suspensao-de-carro-758x606.jpg

فى اختبار كويس للعفشه برده انك تمشى على سرعه مابين 70-80 وتعمل العربيه على وضع المور وتقوم ضارب فرامل مره واحده وتسيب الدريكسون فى الوضع المستقيم .. لو العربيه حدفت يمين او شمال حاجه بسيطه ده عادى وطبيعى انما لو لقيت العربيه حدفت جامد يمين او شمال هنا ممكن تكون المشكله فى السيرفو ممكن مش بيوزع ضغط الزيت كويس او ممكن يكون فيه طنبوره مش تمام

اختبار الكبالن

1-260.jpg

خد اى ملف دوران للخلف بسرعه وزود بنزين عن الطبيعى , لو سمعت صوت طقطقه يبقى كدا الكبالن فيها مشكله .. ولو عايز تحافظ بشكل عام عن الكبالن لازم تاخد اى يو تيرن بالهداوه خالص


شارك هذا المقال: