3 خطوات تعملهم علشان محدش يقولك يافاشل

كيرلُس إدوارد

من اكتر المقولات الي بحبها هي جملة “ Formal education will make you a living but Self Education will make you a Fortune “
الجملة دي بتوضح الفرق بين الشخص " العادى" والشخص الطموح الي عاوز يوصل لهدفه ويحقق حاجة في حياته ميقدرش يوصلها الشخص "العادي" و الفرق بينهم هو طريقة التعليم.

طبعاً كلنا بنتعلم من اول مرحلة الحضانة لغاية التخرج من الجامعة, لكن ده التعليم الي كل الناس بتحصل عليه. ايه الي هيميزك عنهم؟
معروف ان الي بيحب حاجة هيحب يتعلم عنها كل حاجة, لو بتحب الفلوس اقرأ عن الفلوس, لو بتحب الاكل اتفرج علي برامج الطبخ, لو بتحب الكتابة أقرا كتير, لو بتحب العربيات سوق كتير واركب عربيات كتير.
علشان تكون متميز في مجال شغلك وحياتك عموماً لازم متقفش ابداً, اتقدم ببطئ لكن متقفش, كل يوم حاول تتعلم حاجة جديدة في مجالك و لحسن حظنا اننا دلوقتي مبقاش في حاجة مستحيلة "حرفياً" دلوقتي اي مجال بتحبه تقدر تقرأ عنه وتقدر تاخد فيه كورسات اونلاين كمان و ده المقصود بالـ Self-Education

قبل ما نتكلم في اي حاجة خلينا متفقين ان مفيش مرحلة معينة لأنك تتعلم عن الحاجة الي بتحبها و عاوز تشتغل فيها لكن انسب وقت هيكون جنب دراستك ويفضل فترة ثانوي وجامعة هتكون لسه مش عليك مسؤوليات كتير وهتكون واعي لاهدافك وبتخطط انت عاوز تكون ايه

business-2879465_960_720.jpg

علشان تبدأ تعلم نفسك بنفسك لازم تمشي علي الخطوات دي

1 – حدد مجالك واهدافك

من اشهر الجمل الي بؤمن بيها هي “ You can be anything you want”.
انك تبدأ Self-Education هتكون معندكش حدود زي المجموع والتنسيق والحاجات التقليدية الي متعودين عليها, انت هتكون مع نفسك تقدر تختار اي مجال " ماعدا الطب اعتقد : D " وتبدأ تاخد كورسات فيه و تقرأ عنه.
وخد بالك الخطوة دي مش سهلة, وتعتبر من اصعب الخطوات لأن معظم الناس مبتبقاش عارفة هي عاوزة ايه او شايفه نفسها ازاي.
علشان تقدر تحدد مجالك بص حواليك, هل في شخصية معينة او وظيفة معينة ديماً كنت شايف نفسك فيها؟ هل في مجال معين بتحبه؟ هي في Lifestyle معين نفسك تعيشه؟ تقدر برده تشوف مجالات كتير ممكن تكون ملهمة ليك من خلال انك تتفرج علي TED Talks مثلاً.

2 – حددت مجالك! طب وبعدين؟

اسهل طريقة و هي متاحة تحت ايدينا كلنا هي الانترنت هتلاقي كورسات كتير للمجال الي حددته زي كورسات الماركتينج والسيلز و تصميم برامج الموبايل وتصميم الموقع والعلاقات العامة وكورسات مونتاج وحاجات كتير جداً وتقدر تستفاد بمواقع بتدي كورسات منظمة و Career path منظم زي Lynda و Udemy و Coursera
كمان لازم تتابع الايفنتات وورش العمل الي بتحصل حواليك والي تخص مجالك هتلاقي كورسات كتير وورش عمل في اماكن مختلفة زي مكتبة السفارة الامريكية بالقاهرة واماكن تانية.

3 – الشغل و الخبرة

مفيش حد بيشغل حد معندهوش خبرة, والخبرة هتيجي منين من غير شغل؟ ممكن الموضوع يبان لك كـ Loop مبتخلصش لكن الفكرة بسيطة جداً وبتتحل بأنك بتتدرب علي المجال الي انت عاوز تشتغل فيه عن طريق ورش العمل والتطوع والاهم دلوقتي وجود Internships في معظم المجالات تقريباً وهتلاقي معظمها في الصيف في فترة الاجازة تقدر تنزلها وتدرب علي شغل حقيقي في بيئة عمل حقيقية.

head-2748333_960_720.jpg


في النهاية الي بيحب يوصل لحاجة بيوصلها و التلت خطوات الي فاتوا تقدر تعتبرهم بداية لأي مجال حابب تشتغل فيه لأني جربتهم بنفسي ونفعوا تماماً وتطبيقهم سهل مش صعب وفرص العمل المتوفرة للي بيمشي علي الخطوات دي اكتر بكتير من الي مبيحددش خطوات لنفسه.


شارك هذا المقال: