تلبس إيه فى أول خروجة تعارف ؟

مروان حازم

دلوقتى الست الوالد عايزة تفرح بيك و نازلة زن زن زن على ودنك لحد ما قررت أخيرا انك تاخد الخطوة و تتخبط فى مخك و تتجوز. لحد هنا و كله تمام لحد ما الست الوالدة برضه تيجى تقولك عارف بنت الست فلانة و طبعا انت متاخدش فى بالك بسس خد بالك بقى من الكلمة الى جاية دى احنا هنخرج نقابلهم بكرة و تتعرفوا على بعض. كدة انت اتاخدت غدر يا معلم طيب تعمل ايه تعمل ايه, و لا يهمك انا هظبطك متخافش.

يوم مقابلة التعارف دة بيبقى يوم مهم لانه بيبقى كانك رايح تعمل انترفيو بالظبط, هيتبصلك كدة و تتقيم من كل عنصر محطوط على جسمك طيب واحدة واحدة كدة و ناخد الموضوع من الاول.

النظافة الشخصية:

people-2557408_960_720.jpg

طبعا بلاش جو انك تعدى على الحاجة من الشغل و تاخدها و تروحوا على طول دة, هيبقى ريحتك عرق حتى لو مش ظاهر هما بياخدوا بالهم من الحاجات دى و غير كدة ريحة المكاتب بتلزق فا انت تروح بدرى شوية لو عرفت و تاخد الدش المتين و تهدى شوية كدة و بعدين تظبط دقنك و شنبك و تظبط الدنيا كدة و تحط مزيل نضيف و برفان نضيف برضه بلاش استرخاص من الاول و بعد كدة تشوف بقى هتلبس ايه و نصيحة مهمة يا ريت تكوى هدومك و تخليها كلها متأيفة كدة و مظبوطة و تبقى مظبط هدومك من قبلها بيوم لاى طوارئ.

الطقم:

people-2942813_960_720.jpg

يفضل انك تنقى حاجة هادية و بسيطة و بلاش مبالغة انتوا مش رايحين تتنططوا على بعض و بلاش كاجوال اوى عشان متعكش الدنيا يعنى ممكن سمارت كاجوال افضل و بلاش بدلة عشان متكبرش نفسك زيادة عن اللزوم انت مش رايح مقابلة اولياء امور و لونها مقابلة اولياء امور بحقيقي يعنى.

غير كدة حاول تلبس حاجة مريحة عشان تبقى براحتك و مفيش حاجة تبقى واخدة تفكيرك غير اجوبة الاسئلة الى هتتسألها, بلاش الضيق قوى ولا الواسع اوى مش عايزين ندى انطباعات غلط. حاول تلاقى الطقم الى بيخليك تبان حسين فهمى فى نفسك كدة و بيخليك مفرود و تملى عين اى عروسة

أمثلة:

outfit-1.jpg

outfit-2.jpg

outfit-3.jpg


و بعدين بقى نيجى لاهم حاجة انت لازم تبقى عامل حسابك انك يبقى معاك فلوس تحاسب بيها على الترابيزة كلها حتى لو الجوازة مش هتنفع برضه تحاسب على كل حاجة انت مش خارج مع اصحابك, و خد بالك ممكن تكون عروستك المستقبلية صاحبة العروسة الى اترفضت فا خلى شكلك جنتل عشان ميتسيحلكش بكلام ملوش لازمة. و لو الموضوع مشي يبقى ربنا معاك و يسامح الحجة على الغلطة الى عملتها دى و ابقى اعزمنا على الفرح يا ضحية الموسم.


شارك هذا المقال: